सायद

अर्जुन अपवाद 

सायद
यो रातको
उसका लागि अन्तिम ग्राहक
म नै थिएँ की ?

थकित थकित आँखाहरु
हावाले निभाउन खोजेको मैनजस्तै
कमजोर शरिर
चिसो सिरेटोसंगै
यस्तै यस्तै संकेत गरिरहेथे
मौनतामा

सडकजस्तै लमतन्न तेर्सिएका
हजारौं सपना
ढुङ्गा परेको तलाउझैं
अस्थिर अस्थिर

भीडले कुल्चिएको फूल
परेको छ कच्याककुचुक
सम्हाल्न गाह्रो छ
उ कोशिस गरिरहेकी छ
सपना सम्हाल्ने प्रयास

शहरको अन्तिम ढोका लाग्नु अगाडि
फुत्त निस्किएर अँध्यारोमा
सडक नाप्दै गर्दा सम्झिए
उ र मेरो समान हैसियत
यसै जुनीमा सम्भव छ ?

apawad@hotmail.com