दीपक हत्यामा फैसला, २ लाई जन्मकैद ।

मिर्गेको कालिढुङ्गा माध्यामिक विद्यालय व्यवस्थापन समितिको विषयमा भएको झडपमा हत्या गरिएका दिपक दाहालको हत्यामा संलग्न भएको ठहर गर्दै जिल्ला अदालत दोलखाले २ जनालाई जन्मकैदको फैसला गरेको छ ।

जिल्ला न्यायाधिस प्रभा बस्नेतको इजलासले आज मिर्गे गाविस वडा नं. ७ वस्ने गोविन्द दाहाल र सिताराम दाहाललाई घटनामा प्रत्यक्ष संलग्न भएको भन्दै मुलुकी ऐनको ज्यान मार्ने महलको धारा १७ उपधारा ३ बमोजिम यस्तो फैसला गरेको हो ।

दीपक दाहालको फेसबुकमा भेटिएको तस्बिर 

२०६६ सालको चैत्र महिना ६ गते विद्यालय व्यवस्थापन समिति गठनको विषयलाई लिएर भएको झडपमा दिपक दाहालको हत्या भएको थियो । हत्यामा संलग्न भएको भन्दै १४ जनाविरुद्ध कर्तव्य ज्यान मुद्धा दायर गरिएको थियो । मुद्धामा फैसला गर्दै जिल्ला अदालतले हत्यामा सहयोग गरेको भन्दै मिर्गे गाविस वडा नं. ७ बस्ने सुर्य दाहाल, पष्कर कुमार दाहाल, छत्र दाहाल र कुलप्रसाद दाहाललाई जनही २ वर्ष कैद हुने फैसला गरेको छ । बाँकी अभियुक्तहरुलाई अदालतले सफाई दिएको छ । 

यसैगरि दमयन्ती दाहालको घरमा आगलागी गरेको मुद्धामा २ जनालाई ४ वर्ष कैद सजायको फैसला गरिएको छ । दाहालको हत्यापछि आक्रोशित समूहले दमयन्ति दाहालको घरमा आगजनी गरेको थियो । आगजनी मुद्धामा मिर्गे ८ का रामशरण नेपाली र तेज बहादुर दाहाललाई जनही ४ वर्ष कैदको सजाय हुने तथा आगलागीमा सहयोग गरेकोमा मिर्गे ८ का शेषनारायण दाहाल, रञ्जिबकुमार दाहाल, निरोज दाहाल र मिर्गे ९ का तेञ्जिङ शेर्पालाई जनही २ वर्ष कैद हुने फैसला अदालतले गरेको छ । आगलागीमा क्षति भएको अन्नको क्षतिपुर्ति भराउन अदालतले आदेश दिएको छ । यसै घटनामा आधारित डाका मुद्धा भने अदालतले खारेज गरिदिएको छ ।