तामाकोशी शेयरको विवाद बढ्दै

स्वदेशी लगानीमा निर्माण हुन लागेको माथिल्लो तामाकोशी जलविद्युत आयोजनाले दोलखा जिल्लावासीका लागि जारी गर्ने शेयरका बारेमा विवाद बढेको छ । आयोजना निर्माण भईरहेको लामावगर गाविसको जस्तै आफुहरुले शेयरमा विशेषअधिकार पाउनुपर्ने छिमेकी गौरिशंकर गाविसका बासिन्दाको मागपछि विवाद बढेको हो ।

आयोजनाको लागि गौरिशंकरबाट बहने रोल्वालिङ खोलाको पानीलाई समेत उपयोग गरिने तय गरिसकिएको छ । ‘शेयरमा हामीलाई सुनिश्चित गरिएन,’ स्थानिय गोविन्द आचार्यले भने । उनका अनुसार समान शेयरका लागि जिल्लमा रहेका राजनैतिक दललाई स्थानिय सरोकार समितिले ज्ञापन पत्र बुझाईसकेको छ । ‘माग पुरा नभए आन्दोलनमा जानुको विकल्प छैन ।’

यसअघि जिल्ला जलसरोकार समितिले लामावगर गाविसलाई जिल्लाका नाममा छुट्याइएको शेयरमध्ये ४ प्रतिशत लामावगर गाविसवासिलाई सुनिश्चित गर्ने निर्णय गरेको थियो । यसअनुसार जिल्लामा शेयर प्राप्त गर्ने नागरिकको तथ्याङ्क संकलनका लागि जिल्ला विकास समितिले गाविसमा कार्यरत सामाजिक परिचालकहरुलाई जिम्मेवारी दिएको थियो । निर्धारीत १५ दिनको अवधीमा आधामात्र तथ्याङ्क संकलन भएका कारण  १५ दिनको म्याद बढाइएको जिल्ला विकास समिति दोलखाका सुचना अधिकृत विक्रम कार्कीले जानकारी दिए । ‘तथ्याङ्क संकलनपछि मात्रै कति जनाले शेयर प्राप्त गर्छन भन्ने एकिन हुन्छ ।’

नागरिकता लिने बढे

शेयर जारी गर्ने सुचना स्थानिय माध्यमबाट बढेसँगै जिल्ला प्रशासन कार्यालयमा नागरिकता लिनेको संख्या बढेको छ । सुचना आएपछि  नागरिकता र पासपोर्ट दिनमा ३ सयसम्म जारी हुने गरेको छ । सहायक प्रमुख जिल्ला अधिकारी औलख बहादुर आलेले भने । सुचना आउनु अघि १ सय ५०/२ सयको हाराहारीमा नागरिकता पासपोर्ट जारी हुने गर्दथ्यो । 

विवाह दर्ता र जन्मदर्ता गर्न स्थानीय निकायमा भ्याइनभ्याई 

शेयरका जारी हुने भएपछि गाविस तथा नगरपालिकामा विवाह दर्ता र जन्म दर्ता गराउनेको संख्या पनि ह्वात्तै बढेको छ । भीमेश्वर नगरपाललिकाको स्थानिय पञ्जिकरण शाखामा भीड बढेको छ । शेयरका लागि तथ्याङ्क संकलन सुरु भएपछि भिड बढेको नगरपालिकाले जानकारी दिएको छ । ‘पहिले शाखामा एक जना कर्मचारी  हुँदा पनि काम भ्याइएको थियो । अहिले २ जनाले पनि काम भ्याउन मुश्किल परिरहेको अवस्था छ’, नगरपालिकाका कर्मचारी ज्ञानु खड्काले भने ।

सेतोपाटी