स्विकारोक्ति

अर्जुन ‘अपवाद’

हो मैले जानिन
तिम्रो नियम मानिन
त्यसै कारण
तिम्रो समाज मलाई बहुलाहा उपाधी भिराँउछ ।
मैले अझै बुझ्न सकेको छैन ।
यो समाज यो संसार

सुरु गर्ने त
तिमी नै थियौ ।
तिम्रा पछि अरुहरु लागे
मलाई कसैले सुनेन ।
कसैले बुझेन ।

नजिक पर्दा
अर्कातर्फ मुन्टो फर्काउँछौ ।
समाजका अघिल्तिर
सज्जन र भलाद्मी हुने
प्रतियोगिताको ताज पहिरिन
थुप्रै तर्क प्रस्तुत गर्छौ
मेरा विरुद्ध हरपल

म धेरै जान्दिन
भगवानको रुप फेरिन्छ अरे
त्यो भन्दा धेरै
तिम्रो रुप फेरिन्छ ।
दिन भरिको तिम्रो भलाद्मीपन
सूर्य लुकेपछि मेरो थाङ्नामा गुटमुटिन्छ ।

म सोच्न सक्दिन
यहि नै हो तिम्रो विश्वास
म नसाचेको जस्तै गर्छु
यर्थाथ यहि हो ।

म कुरुप नै हुँ
समाज स्विकार्छ ।
तिमी कुरुप थियौ भन्ने थाहा पाउन
त्यसका लागि प्रमाण जुटाउन
र दोषि सावित गर्न
यो समाजलाई कति समय लाग्ला ?

तिनीहरु विश्वास गर्दैनन्
म ज्युँदै छु अझै
म नै प्रमाण हुँ
खोतलेर त हेर ।

apawad@hotmail.com