वसन्त काव्य गोष्ठि सम्पन्न

‘हिजै फर्क्यो छोरो कफिनमा निश्चल बनी
यता बुढी रुखसँगै ढली आहा ऐया नभनी ।’

कवि जीत कार्कीले वर्तमान समाजलाई लय हालेर प्रस्तुत गरेपछि कार्यक्रमका सहभागीहरु सबै भावुक भए ।  कवितामा कार्कीले वैदेशिक रोजगारले गाँउगाँउमा पारेको असरका बारेमा मात्रै प्रस्तुत गरेनन्, बालिका बलात्कार, अपराध लगायतका विषयहरु समेटेर कविता सुनाए । शनिवार दोलखा सदरमुकाम चरिकोटमा नेपाली लेखक संघ, दोलखा शाखाले आयोजना गरेको वसन्त काव्य गोष्ठीमा दोलखाका दर्जन वढि कविहरुले रचना वाचन गरे ।

कार्यक्रममा प्रस्तुत कविताहरु प्रेमभन्दा पनि धेरै वैदेशिक रोजगारीले पारेको असरका बारेमा केन्द्रित थिए । कवि टहल आचार्यले प्रस्तुत गरेको गजलको अंश

‘हराउँदोछ संस्कार संस्कृति र देशभक्ति,

जन्ती मलामीकै छ खाँचो पलायन छ युवाशक्ति ।’

उक्त अवसरमा दोलखामा कविताको ईतिहासका बारेमा कवि श्रीबाबु कार्कीले कार्यपत्र प्रस्तुत गरेका थिए । उनले कार्यपत्रमा दोलखामा कविता लेखनको ईतिहासक्रम, वर्तमान अवस्थाका वारेमा विवेचना गरेका थिए । उक्त कार्यपत्रमाथि टप्पणी गर्दै साहित्यकार पुष्करनाथ पोखरेलले दोलखाली साहित्यका बारेमा अझै खोज अनुसन्धान गर्नु जरुरी रहेको वताए ।

नेपाली लेखक संघ दोलखाका अध्यक्ष डम्बर चौंलागाँईको अध्यक्षतामा सम्पन्न कार्यक्रममा युवा सािहत्य सञ्जाल दोलखाले प्रकाशन गरेको पुस्तक प्रगतिका पाईलाहरुको विमोचन गरिएको थियो । पुस्तकको विमोचन प्रज्ञा प्रतिष्ठानका उपकुलपति विष्णुविभु घिमिरेले गरेका हुन । कार्यक्रममा मन्तव्य राख्दै उनले भने ‘कलाकारविहिन समाजको अस्तित्व हुँदैन । नेपाली समाजबाट भानुभक्त, बेलायती समाजबाट शेक्सपियर हटाउने हो भने ति समाजको अस्तित्व रहँदैन ।’