मेडिकल शिक्षामा भएका वेथितीका विरुद्धमा पटकपटक अनसन गर्दै सरकारलाई वेथिति हटाउनका लागि वाध्य पारेका त्रि.वि. शिक्षण अस्पतालका डाक्टर गोविन्द केसीले उमेरहदका कारण २७ असोज २०७६ मा अनिवार्य-अवकास पाएका थिए । भोलीपल्ट २८ असोजमा दोलखा आएका उनले चरिकोटको प्राथमिक स्वास्थ्य केन्द्रको निरिक्षण पनि गरेका थिए । अस्पताल श्रोतका अनुसार उनले त्यहाँका सबै कोठा तथा प्रदान गरिएका सुविधाहरुका बारेमा चाख राखेर जानकारी लिएका थिए । अस्पतालको भ्रमणपछि पत्रकारहरुसँग कुरा गर्दै उनले अस्पतालले दिएको सेवा सुविधा सन्तोषजनक रहेको बताएका थिए ।
हेर्नुहोस दीक्षण दैनिकको युट्युबमा रहेको भिडियो ।
हेर्नुहोस दीक्षण दैनिकको युट्युबमा रहेको भिडियो ।
चरिकोटपछि उने झुलेतिर लागेका थिए । झुले उनको मावली गाउँ हो । उनले केहि वर्ष झुलेको अमर माविमा पढेका थिए । उनले झुलेमा आफ्ना साथीहरु तथा आफन्तहरु भेटेका थिए । झुलेमा उनको एउटा भेटघाटबारे उनिसँगै रहेका श्रीबाबु कार्कीले एक संस्मरण लेखेका छन् । उनले फेसबुकमा राखेको संस्मरण जस्ताको तस्तै
........
डा. केसीले भने-
तपाईंको त टाउको लुकाउने ठाँउ त छ, मेरो त.......!
-श्रीबाबु कार्की उदास
त्यतिबेला भीमा भुजेल प्रसन्न थिए । जतिबेला आफ्नो बालापनको साथी प्राध्यापक डाक्टर गोविन्द के. सी. उनको घरमा टुप्लुक्क आइपुगे ।
भीमा भुजेललाई पहिलोपटक केसीलाई चिन्न नै गार्हो पर्यो । निकैबेर मुखमा हेरिरहे र आश्चर्यसूचक आवाजमा भने -
" .......आम्मै ! गोविन्द बाबु पो ! " -केसीले भीमा भुजेललाई पहिले नै - "भीमा दाइ नमस्कार " भनी सकेका थिए । नमस्कार फर्काउँदासम्म भीमा भुजेललाई नमस्कार गर्ने ब्यक्ति को हुन भन्ने खुट्टयाउन सकिरहेका थिएनन् ।
अक्सर आफैंले नमस्कार गर्न अभ्यस्त भीमा भुजेल निक्कैबेर हात जोडिरहे, आश्चर्यजडित् मुद्रामा केसीकै अगाडि ठिङ्ग उभिरहे । निकैबेर उनीहरूको आँखा एकाकार भइरह्यो ।
भीमालाई यति धेरै आदरकासाथ नमस्कार खान पाउँदा अचम्म मात्रै लागेन, डाक्टर सा'वकाे हार्दिकताप्रति नतमस्तक बन्न पुगे । उपल्लो तहमा पुगेका ब्यक्तिबाट पाएको हार्दिकता भीमा भुजेलको जीवनमै यो पहिलो थियो ।
भुजेलले जीवनमा धेरैसंग उठबस गरे तर यस्तो न्यानो सम्मान पहिलोपटक अनुभुति गर्नपुगे ।
आफुले सानै उमेरमा भान्जाको रूपमा खेली हुर्काएका केसी देशकै अशल डाक्टर बनेकोमा भीमा प्रसन्न थिए । यद्यपि यसरी आफुलाई नाता लगाउँदै घरमा आइपुग्लान भन्ने त कल्पना समेत गरेका थिएनन् । अक्सर आफ्नो पेशागत मुल्यमान्यतामा टाढा दृढ केसी स्वास्थ क्षेत्रका लागि कुसाग्र ब्यक्तित्वका रूपमा स्थापित छन । जागिरे जीवनभर केसीले न नातागोता भने न साथी संगातीलाई नै समय दिन भ्याए । पेशागत मान्यतामा केसी जस्तोसुकै अबस्थामा पनि किन्चित चुकेनन । दिनदुखीको सेवा र स्वास्थ सुधारका लागि उनले जीवनमरणको कसर बाँकी राखेनन ।
यद्यपि गाउँले नातामा भान्जा पर्ने डा. केसी आफ्नो पुराना साथीसङ्गाती, मान्यजन, गुरुहरु खोज्दै मामाघर दोलखाको झुले पुगे । उनको तीनदिने मावली भेटघाटका क्रममा भीमा भुजेल पनि केसीको उच्च प्राथमिकतामा रहे । पुरानो सम्बन्धका भुजेलसंग भेट्न पाउँदा केसीमा खुसीको सीमा थिएन ।
मामाघरका हजुरबुबा स्व. अमरबहादुर कार्कीको स्वर्गाराेहणकाे खबरले आफ्नी आमासंगै मावली गाउँ झुले पुगेका केसी हजुरआमाको आग्रहमा तीनबर्षकै उमेरदेखि मावली बसेका थिए ।
मावली गाउँ झुलेमा बसेका केसीले आधारभूत तहको शिक्षा हालको श्री अमर माध्यमिक बिद्यालयमा लिएका थिए । माध्यमिक शिक्षा भने काठमाडौंको श्री पद्माेदय मा.बि. ,दोलखाको जिरी मा.बि. हुँदै श्री भीम मा.बि.बाट एस.एल.सी. गरेका थिए ।
अध्ययनमा निक्कै मेहनती र मेधावी रहेका केसी सानैदेखि पढ्नमा अब्बल थिए । केसीलाई प्राथमिक तहमा अध्ययन गराउने शिक्षक श्री ढालबहादुर कार्की भन्छन - "गोविन्द बाबु सानै उमेरदेखि डाक्टर बनेर बिरामीको सेवा गर्ने अठाेट राखेर पढ्थे ।"
केसी ठुलो भएपछि आफू जसरी पनि डाक्टर बनेरै छाड्ने र दुखी गरिव मानिसहरुको सेवा गर्ने इच्छा राख्थे । डाक्टरहरु 'मेवाभावले नभएर सेवाभावले' ओत्प्रोत भएर आउनुपर्ने अहिलेसम्म केसीको आदर्श छ । कार्की सम्झछन् -"हुने बिरुवाको चिल्लो पात हुन्छ भन्छन् त्यो गुण सानैदेखि केसीमा थियोे ।"
 |
| भुजेलसँग केसिः तस्विर श्रीबाबु कार्कीको फेसबुकबाट |
यता आफ्नो बाल्यकालका प्रिय अभिभावक भीमा भुजेल बिश्वप्रसिद्ध लेखक अल्वेयर कामुले जन्माएको एक दुखी पात्र 'सिसिफस'झैँ आफ्नो अगाडि देख्न पाउँदा डाक्टर केसी मनमनै दुखी मात्रै भएनन् गम्भीरतापूर्वक भुजेललाई नियालीरहेका थिए । उनले भुजेलको स्वास्थ स्थितिप्रति निक्कै चासो समेत राखेका थिए । -अहिलेसम्म खासै औसधि खानु परेको छैन । भीमा भन्दैथिए -" भगवानका कृपाले आजका मितिसम्म कुनै रोग छैन ।" भुजेलको स्वस्थ शरीर र हष्टपुष्ट अनुहार देखेर डाक्टर केसी पनि खुशी थिए ।
छुटने बेला केसीले भीमा दाइको घर चारैतिर हेरे अनि भने भीमा दाइको सानो चिटिक्क परेको घर पनि बनेछ ।
भीमा मुसुक्क मुस्कुराउँदै भने -"हजुर ! सरकारले बनाइदियो ।" केसीले ठट्यौली शैलीमा भने - "तपाईंको त जाडाेमा टाउको लुकाउने ठाँउ त बनेछ । आफ्नो त त्यै पनि छैन ।
झण्डै चार दशक भेटघाट नभएका उनीहरुको त्यो क्षण हेर्नेहरुलाई समेत अचम्मित पारिरहेको थियोे । डाक्टर केसी पटक-पटक आफ्नो खल्तीबाट चकलेट झिक्दै भुजेलको कैले हातमा त कैले खल्तीमा राखिदिन्थे भने कहिले अङ्गगालो हालेर 'नोष्टाजिक' हुन्थे ।
२६ बर्षे सरकारी जागिरे जीवनबाट उमेरहद्का कारण अनिवार्य अबकास पाएको भोलिपल्टै झुले आएका केसीसङ्ग बालपनका धेरै स्मृतिहरुमा पिङ खेलिरहेको भानहुन्थ्यो ।
हिड्ने बेलामा केसीले आफ्नो वालेटबाट केही पैसा झिकेर भुजेलको खल्तीमा राखिदिए । हार्दिकताका साथ अंकमाल गरे । भुजेलले आफ्नो घरमा आएका केसीलाई चिया पिउने आग्रह गरे ।
केसीले बिगत पन्ध्रबर्षदेखि चिया छाडेकाे हुँदा चिया होइन भीमा दाइको हातबाट एक गिलास पानी मात्रै खाएर जाने आग्रह गरे । एकल रहेका भुजेलले आफ्नो नवनिर्मित घरभित्रबाट केसीलाई गिलासमा पानी ल्याएर दिए ।
भुजेलले भर्खरै सरकारी अनुदानमा भुकम्प प्रभावितहरुको कोटामा भतिजाको जग्गामा एककोठे घर निर्माण गरेका थिए । जीवनभर एकल रहेका भीमा भुजेललाई कहिल्यै घरजमको चिन्ता भएन । भुकम्प प्रभावितहरुका लागि सरकारले दिएको अनुदानले नै भीमा भुजेलको घर बन्ने आधार बन्यो ।
गाउँपालिकाले उनलाई सुकुम्बासीमा सूचीकृत गरी घर निर्माण भएको जग्गा खरिद गर्न डेढलाख रुपैयाँ सहयोग गरेको थियोे ।
हेर्दाहेर्दै भुजेलका आँखामा बिगतका रमाइला स्मृतिहरु पिङ खेल्न थाले । झन्डै एक घण्टाको बसाईमा डाक्टर केसी र भुजेलको रमाइलो कुराकानी भए । लाग्थ्यो दुबैको मन एक अर्कासंग छुट्टिन मानिरहेको छैन ।
जहाँ काम गर्यो त्यहीँ खानेबस्ने भुजेलको जीवन कहालीलाग्दो छ । जीवनभर संघर्स गरेर हातमुख गर्ने भीमा भुजेल झन्डै चारदशक उमेरको यात्रामा छन् । भुजेल जीवनदेखि कहिल्यै चिन्तित रहेनन । सधैं हाँसीखुशी रहने भुजेल सामाजिक काममा समेत सक्रिय छन । बाटोघाटाे सरसफाइ गर्ने, पुलपुलेसा मर्मतदेखि कयौं सामाजिक काममा भुजेलले हार्दिकताका साथ सहयोग पुर्याउँदै आएका छन । बाटोको ढुङ्गा लड्दा होस् या कुलो भत्किदा भीमा मन थाम्न सक्दैनन् ।
कर्मशील भीमा भुजेलले डाक्टर केसीसंग आफू आफ्नो जीवनसंग खुसी रहेको बताएका थिए ।
ऊनी भन्थे - "हामी भगवानका सन्तान हौं, हाम्रो सुखदुःख हेर्ने भगवानकै जिम्मामा छ ।" डाक्टर केसी उनको आत्मबिश्वास देखेर मुसुमुसु हाँसिरहन्थे ।
No comments:
Post a Comment