आज वातावरण दिवस रैछ । धेरै वातावरण दिवसहरु मनाइयो । कतै विर्सिएर गए । कति प्रसङ्गबस सम्झनामा आउलान । २० वर्षअघितिरको एउटा वातावरण दिवस भने सम्झनामा छ । किनभने त्यसमा मैले कविता बाचन गरेको थिएँ । त्यो पनि विद्यालयकै मिसले लेखिदिनुभएको ।
वातावरण जोगाउँ हामी सबै मिली
वातावरण जोगाएमा बन्छ हरियाली ।
यो २ लाइनभन्दा बढि कविता सम्झन सक्दिन । हनुमन्तेश्वर उच्च माध्यामिक विद्यालयमा ग्रिन क्लबले कविता प्रतियोगिता आयोजना गरेको थियो । विद्यालयको तर्फबाट म कविता बाचनमा जाने भएँ । आफूलाइ कविता भनेको के हो थाहै थिएन । रजुना मिसले कविता लेखिदिनुभयो । विद्यालय पोशाकमै जानुपर्ने थियो कार्यक्रममा । अरु त्यसरी लगाउन मिल्ने कपडा पनि थिएनन् कि !
विहानै सर्ट धोएर चिसै सर्ट लगाएर काब्रेतिर लागियो । बाटामा गाउँलेले भेटे । उनिहरु काब्रेबाट लहरेमाने पसलको सामान लिएर आएका थिए । लुगा चिसै देखेर उनिहरुले भने के भयो । मैले खोलामा लडें भने । पुलबाट । सबैले पत्याएछन् । पछिसम्म पनि सोध्दै थिए । मलाइ अहिले लाग्छ सहि कुरा भनेको भए पनि हुन्थ्यो होला ।
हनुमन्तेश्वर माध्यामिक विद्यालयमा कविता सुनाइयो । डरले के के भनियो । थाहा भएन । पुरस्कार पाउनु त परको कुरा !
आज म कविता लेख्छु । तर लाग्छ कविताप्रतिको आकर्षण यहि घटनाले बढाइदिएको हो । कविता लेखेर पनि प्रतियोगितामा सहभागि गराउने रजुना मिस र प्रतियोगितामा पठाउने विद्यालयले नै मलाई अरुका अगाडि बोल्न सक्ने बनाइदिए । आजका लागि मेरो त्यहि सम्पत्ति हो । सबैमा आभार ।
No comments:
Post a Comment