बिर्सिएपछि

भर्खरैसम्म सम्झना थियो
अहिले विर्सिएछु
मनले पनि
कत्तिचाँडै विर्सन सकेको .?

केही प्रसङ्ग बिर्सनुपर्ने नै थिए
बिर्सिएर राम्रै भयो ।
केही कहिल्यै बिर्सनु नहुने थिए
तिनिहरु नि विर्सिएछन्
राम्रो भो की नराम्रो ?

कुनै बखत विर्सन नसक्दा
म बेचैन थिएँ
कयौँ दिन वितेथे विर्सने प्रयासमा
तर,
सम्झना झनै बलियो भईदिन्थ्यो
मन मर्माहत बनाउँदै ।

कसरी सबै बिर्सिइयो आज
सम्झदै छु मनभित्रै
तर्क विर्तक दिमाग वरपर ।

ढुक्क हुनु तिमी
मैले तिम्रा हरेक कर्तुत पनि
आजैका मितिबाट विर्सिएको छु
कहिल्यै कहिल्यै नसम्झने गरेर ।

तिम्रा अवगुणहरु सँगसँगै
गुणहरु पनि बिर्सिएको छु,
तर पनि
तिमीलाई बिर्सन
गाह्रो गाह्रो भैरहेछ ।

कुनै समय कहिल्यै नबिर्सने
बाचा गरेथ्यौं क्यार  हामीले
त्यो पनि मैले बिर्सिसकेको छु

ढुक्क हुनु तिमी
म अब चाहेर पनि
विगत सम्झने छैन ।
हिजो अस्तीजस्तै ।

२०७० पौष ४