दशैंसम्ममा माथिल्लो तामाकोसीको शेयर, दोलखालीका भागमा ५० हजार रुपैयासम्म

आयोजनाको गोगरमा रहेको प्रबेश सुरुङ्ग 

जिल्लाको लामावगरमा निर्माण हुँदै गरेको माथिल्लो तामाकोसी जलविद्युत आयोजनाले आउने दशैं अगावै शेयर जारी गर्ने भएको छ । सदरमुकाम चरिकोटमा आज सम्पन्न माथिल्लो तामाकोसी आयोजना समन्वय समितिको बैठकले यस्तो निर्णय गरेको हो ।

आयोजनाले जारी गर्ने शेयरको १० प्रतिशत दोलखावासीका लागि छुट्ट्याइएको भएपनि कसरी वितरण गर्ने भन्नेमा विवाद रहँदै आएको थियो । बैठकले दोलखामा बसोबास गर्ने सबै नागरिकलाई ५ देखी ५० हजार रुपैंयासम्म शेयरमा लगानी गर्ने गरी निर्णय गरेको बैठकमा सहभागी नेकपा एमाले दोलखाका अध्यक्ष इश्वरचन्द्र पोखरेलले जानकारी दिए । उनका अनुसार २०६४ साल माघ १५ गतेभन्दा यता बसाँई सरि आएकाहरुले भने शेयर खरिद गर्न पाउने छैनन् ।

बैठकमा माथिल्लो तामाकोशी जलविद्युत आयोजनाका प्रमूख विज्ञानराज श्रेष्ठ, जिल्लामा क्रियाशील राजनैतिक दल, नागरिक लगानीकोष, नेपाल धितोपत्र बोर्डका प्रतिनीधिहरुको सहभागिता रहेको थियो ।

४ सय ५६ मेगावाट क्षमता रहेको यो आयोजनाको शेयर खरिद गर्नका लागि आवाश्यक प्रकृयाहरुका बारेमा केहीदिनभित्रै सार्वजनिक सञ्चारमार्फत सुचना जारी गरिने बैठकमा सहभागी भएका कांग्रेस दोलखाका प्रतिनीधि रुद्र खड्काले जानकारी दिए ।

बैठकले दोलखालीले पाउने १ अर्व ५ करोड रुपैंया बराबरको शेयरमा आयोजना निर्माण भईरहको लामावगर गाविसका बासिन्दाहरुलाई सो को ४ प्रतिशत सुनिश्चित गर्ने निर्णय समेत गरेको छ । यो निर्णयका कारण लामावगरका प्रत्येक वासिन्दालाई करिब १ हजार ६ सय रुपैंयाबराबरको शेयर सुनिश्चित गरेको छ ।

आयोजनाले २०७३ सालसम्म विद्युत उत्पादन गर्ने लक्ष्यसहित काम भईरहेको जानकारी दिएको छ ।