दोलखाको सिङ्गटी बजारका लोकराज पाठक रुघाखोकीका कारण विरामी परेपछि बजारमा रहेको स्वास्थ्य संस्थामा जाँच गराउनका लागि गए । स्वास्थ्यकर्मीले उनको जाँच त गरे तर संस्थामा औषधी नभएका कारण उनि रित्तै फर्किए । “डाक्टरहरुले राम्रैसँग चेकजाँच गरे । औषधी छैन भनेर लेखेर पठाए । बजारमा रहेका औषधी पसल चहार्दा बल्ल बल्ल औषधी पाईयो ।”
पाठकमात्रै हैन सिङ्गटी बजारमा रहेका स्वास्थ्य संस्थामा आउने बिरामीहरु औषधी नपाएर फर्कनुपरिरहेको छ । दैनिक ४, ५ जना स्वास्थ्य संस्थामा सेवा लिन आउने गरेपनि औषधीबिना रित्तै फर्किरहेको पाठकले बताए । “निजी औषधी पसलमा पनि औषधी पाउन छोडिएको छ ।”
सिङ्गटी बजार जिल्लाको उत्तरी क्षेत्रका २२ गाविसको व्यापारिक स्थल हो । यहाँ रहेका स्वास्थ्य संस्थामा अहिले औषधीको चर्को अभाव देखिन लागेको छ । सिङ्गटी बजारको जस्तै समस्या जिल्लाभर देखिन लागेको जिल्ला स्वास्थ्य कार्यालय दोलखा स्विकार गर्छ ।
तराईमा जारी सडक अवरोध र भारतिय पक्षले गरेको नाकाबन्दीका कारण भूकम्पले थलिएको दोलखा झनै थला परेको छ । स्वास्थ्य संस्थामा केहि औषधीहरु पाउन छोडिएको छ । केहि औषधी मुस्किलले २ हप्तालाई पुग्ने अवस्था रहेको जिल्ला स्वास्थ्य कार्यालय दोलखाले जानकारी दिएको छ । “बालबालिकाका लागि ज्वरोका लागि प्रयोग गरिने सिटामोल सिरप, तथा पखालाका लागि प्रयोग हुने मेट्रोनिडाजोल लगायतका औषधी सकिएको छ”, कार्यालयका प्रमूख डा. माधव लम्सालले भने ।
दोलखा जिल्ला भूकम्पबाट अति प्रभावित १४ जिल्लामध्येको एक हो । टहरामा बास बसिरहेका भूकम्पपिडितका चिसोका कारण बिरामी परिरहेका छन् । सरकारले भूकम्पप्रभावित जिल्लाका लागि सुरुमा धेरै मात्रामा औषधी पठाएको थियो । यसका कारण मात्रै अहिलेसम्म औषधीको अभाव भोग्नु नपरेको हो । “सुरुमा अलि धेरै औषधी आएका कारण अहिलेसम्म अभाव नदेखिएको हो । नत्र यसबेलासम्म औषधीको चर्को अभाव देखिईसक्ने थियो”, लम्सालले भने ।
तत्काल औषधीको अभाव आउन नदिनका लागि आन्तरिक रुपमा स्वास्थ्य संस्थाहरुमा जानकारी गराईसकिएको कार्यालयले जानकारी दिएको छ । कार्यालय प्रमूख लम्साल स्वास्थ्य संस्थामा रहेका औषधी आधाआधा गरेर दिनका लागि स्वास्थ्य संस्थाहरुमा जानकारी गराईएको बताँउछन । “स्थिती सामान्य भएमा स्टकमा रहेको औषधीले २ हप्ता पुग्छ । महामारी देखियो भने भन्न सकिन्न ।”
No comments:
Post a Comment